【新增內容及圖片】
網絡盛事「Web TVAsia Awards 2016」今晚喺首爾韓國國際會展中心(KINTEX)，頒獎禮先後頒發多個獎項表揚一眾網絡紅人，當中馬來西亞創作歌手黃明志得獎。
而日本搞笑大叔PIKO太郎就憑《PPAP》獲得日本最受歡迎Video，當PIKO太郎得知獲獎即表現好開心，上到台就高呼：「Oh My God」，之後就話：「攞獎好突然，但好開心，大家有好好享受今晚嘅晚餐？好多謝畀呢個獎我。」之後有魔術表演環節，糖妹仲好幸運被抽中上台做示範，糖妹上到台就以英文自我介紹話：「我係Kandy，來自香港。」糖妹仲瞓喺張枱仔上，被魔術師整個人凌空升起，令台嘉賓睇得勁好奇，不時拿出手機拍照。點知成個魔術為時成幾分鐘都未完，原來魔術爛尾，被升起半空嘅糖妹落唔返來，個魔術師勁尷尬，而鏡頭一轉就即轉返去司儀到，最後要工作人員幫手糖妹先可以落返嚟。事後，糖妹接受訪問就話：「中間發現有問題，個魔術師反問佢死嘞點算呀，我只好繼續瞓住喺度先，但好似做咗好耐嘅腹部運動咁，條腰冇整親，自己冇整親，但都有少少驚。」粉絲知道今晚嘅頒獎禮有女團少女時代(少時)擔任嘉賓後，都相當期待，不過由於少時係壓軸嘉賓，所以粉絲等咗好耐。約於韓國時間11點，期待而久嘅少時終於亮相。少時甫現身台下嘉賓紛紛拎出手機影相留念，連原本坐喺後面嘅嘉賓，為咗近距離見少時都行上前面，力證少時喺世界各地嘅知名度同人氣。8位成員齊齊着上銀色短裙打歌服，大晒美腿吸睛，又唱又跳《Lion Heart》、《Party》、《Hoot》及《Gee》共四首熱門歌曲，亮相約20分鐘就離開。韓國代表最後現身嘅就係擔任頒獎嘉賓嘅韓劇《急診男女》男星崔振赫，而得獎者就係PIKO太郎，再次憑《PPAP》獲獎，更於領獎後表演《PPAP》，氣氛相當高漲，果然係神曲！
